估唔到過去一年喺全義工嘅營運之下，竟然可以舉辦成 56 個活動，服務咗 15,000 人次嘅新舊移民！好多謝超過 50 位義工嘅貢獻超過 3,131 小時，街坊會先至可以能夠有能力去幫到新黎嘅香港人。

大家一齊畀啲掌聲我哋嘅所有義工，仲有下次活動見到義工嘅時候，記得同佢哋講聲多謝呀！

我哋更加歡迎大家加入義工，有興趣嘅話可以填寫以下表格成為義工嘅一員！
https://forms.gle/TtEJCBAXiAm2GjaF7

街坊會將於2月25日，連續第二年參加「全年最冷一夜」（Coldest Night of the Year）年度全國籌款步行，需要你的加入支持！今次我哋會移師到 #溫哥華市東 區域，同其他在地組織一齊步行。

黎到加拿大要投入本地生活，最好嘅方式就係幫本地有需要嘅人士盡一點力量去幫助佢哋。雖然好多街坊都係黎左唔係好耐，不過行幾步路或者捐少少錢就可以參與其中，又可以有益身心、識下朋友，何樂而不為？

1) 距離與路線

今年終於用返「行大隊」參與方式行2公里或者5公里。你可以同我哋一齊行，或者自己行完打咭都得！我哋一行人會喺當日下晝 4:00pm 喺出發／完成點 312 Main St. Vancouver BC V6A 2T2集合登記，然後同其他社區參與者一齊行5公里。

5公里步行路線（只有首尾兩小段經過唐人街）：
https://cnoy.org/maps/2557

加入步行和／或捐款：
http://walk.w-ith.me/VKA

2) 捐款

歡迎街坊搵朋友捐助自己步行，唔想行嘅亦可以捐錢。

介紹返呢度嘅受惠機構 First United：

First United Church Community Ministry Society (commonly known as First United) is an inner- city ministry of the United Church of Canada committed at its heart to the struggle for social justice, offering programs of advocacy, housing and healing in Vancouver’s Downtown Eastside (DTES). In general, we serve adults with complex needs. We have served this community for 135 years, pioneering innovative responses to community needs.

by 會長 Henry

呢輪為《毒舌大狀》北美首映搵贊助嘅時候，有時對方都會問我：

「你係咪全職搞街坊會？」

街外靠同路人維生者眾，好難怪人哋以為我搞呢個會都係為咗搵著數。之前我嘅香港人鄰居都聽我解釋咗好耐，至肯相信我真係「無好處都去搞街坊會」。

講真，我埋頭搞咗兩年，又真係無乜機會同街坊分享我嘅真正職業。我其實係一個全職自由業認證翻譯員。搞街坊會主要因為我自問有能力、抽到時間、經濟上又容許我任性（多謝老公）、同埋我知道自己定嘅方向（睇返我地口號「承傳、接納、共融」）係能夠幫到甚至改變到香港人社群嘅。

今年開始，街坊會進入咗一個新階段：成為一個註冊 NGO（呢度其實叫 not-for-profit）組織。我、Guy 仲有同屬元祖級成員嘅 Jacky 三位成為首屆 Directors。註冊街坊會主要係為咗三樣嘢：

一、名份：要認真去搞呢個平台，始終都要有個正式嘅組織登記。除左可以擁有官方銀行戶口，需要多一個人簽名管數、申請各級政府同機構資助、有名義同本地機構合作、租場平啲、買保險又平啲，仲可以為新移民義工寫推薦信，證明佢哋有加拿大嘅本地經驗，何樂而不為？

二、開支：我哋成日好想做年度計劃，但無資源之下，永遠只能見步行步。兩年黎一路以「零筆直」運作其實真係好攰。另外，文具、器材、租場地、物資、未來希望俾到嘉賓嘅車馬費、運輸、儲存、租地址、行政申請費等樣樣都係錢，義工借出、拉上補下、甚至要倒貼亦對佢哋唔公平；而且，我亦唔想街坊會被貧窮限制想像，希望做到多啲長期活動或者更容易負擔嘅活動去畀街坊參與。口號「承傳、接納、共融」唔係白嗌，但係要做嘅嘢係好多好漫長，無足夠資源可能只會令個會原地踏步。

三、義工：我喺加拿大做義工果陣，每次對方一定問你要唔要返車費，送件 T Shirt 畀你著係基本，間中仲有 pizza 食，活動完左仲有 appreciation dinner 免費擦一餐。雖然我唔介意貼錢搞活動（黎緊慶功宴又係我哋三個 Directors 私人請），但唔代表其他義工都應該好似我哋咁駛錢，尤其未必有太多錢嘅新移民，一路已經付出心機、時間不特止，仲要出埋車錢、飯錢、仲要照俾活動費用。我相信，義工應該有相應嘅認可先至留到人，街坊會將來先可以有人肯承接。

今次街坊會好好彩得到電影發行邀請合辦首映，亦都係一個契機可以俾社區同街坊分擔我哋嘅付出；另外一樣嘢係，街坊會既然有官方地位，咁就可以試行「會籍計劃」，等付出少少會費參加計劃嘅街坊，可以享用到本地商舖提供嘅優惠，撐起香港人嘅經濟圈，壯大香港人社群，呢啲錢亦可以每年幫街坊會喺財政上「打底」。

多謝街坊一路以黎嘅支持同信任，好希望黎緊嘅首映同埋其他活動可以見到大家。如果大家有任何實在嘢（例如迷你倉、會計 etc）可以支持街坊會，亦可以 DM 我哋。

由註冊中醫師 Henry 為大家講解下喺加拿大又濕又凍嘅初春點樣保養身體，喺加拿大嘅新環境健康生活。

日期: 2月13日(星期一)
時間: 7:00pm
平台: Discord直播 ｜ YouTube轉播

同街坊會一齊玩 Snowshoe 啦！
冬天喺加拿大就最啱雪地活動，如果你想親親雪地但又唔識滑雪可以做啲咩？呢個雪鞋行走（snowshoeing)就啱哂大家喇。
着住專用雪鞋，鞋底好似網球拍咁大，等你每行一步，都將體重均勻分散在更大承壓面積上，咁就唔會深陷雪堆中。適合大人細路，新手定高手都一樣咁啱玩。

日期：2月5日星期日
地點 : Mount Seymour
集合時間: 11:00am
預計時間: ~ 2小時 (之後可以一齊食晏)

詳情及報名：https://snowshoeingvka.eventbrite.ca/
報名截止日期：2月1日5:00pm

今年的 Dineout Vancouver 會在1月20日開始至2月5 日，這個每年年頭餐飲業淡季而衍生的節目已經超過20年歷史，而且是加拿大其中一個大型的飲食節。

參與的餐廳都會自訂一個比正價便宜的套餐（通常都係3 course）作招徠，而內容通常都是餐廳最出名的食品，原則上就算是一個小型的 Tasting Menu。對唔會經常出外用膳嘅食客來講，以便宜1/3 至半價的價錢試到比較高檔次的餐廳如 Bacchus、Black + Blue 的菜式其實都划算。不過今年大部分高檔餐廳訂價是 $55 至 $65 一位的 3-course 套餐，老實講比之前一兩年貴了不少。當然，裡面仍有很多平民的選擇，如連鎖店Earls、Tap & Barrel、Cactus Club 等都有 $40 以下的晚餐 。

此外，Dineout 亦會舉辦一些特別的event，數年前小編參加過 Vancouver Aquarium pop-up，食物講不上驚喜，不過當去水族館一遊亦不錯。可惜在唔係在水族箱前用餐，否則其實可以變成一個話題打咭的 event。

今年第一年有米芝蓮，但有參與 Dineout 的一星餐廳就只有 Main 街的 Burdock & Co.，可能其他的已忙到不用Dineout 去招徠客人吧。

小編早幾年都會特地 book Dineout的餐廳，但年復一年 Dineout 期間餐廳都因為客人太多而令食物及服務質素都變得參差，所以現在實在不寄厚望或傾向 Dineout 完結前才去（部分餐廳會在完結後依然提供 Dineout 套餐的）。

各餐廳Dineout menu，訂位同查看特別event 可看官網：

https://www.dineoutvancouver.com

（截圖來自官網）

大家係咪好緊張究竟幾時有得睇《毒舌大狀》嘅北美首映呢？詳情終於定咗喇：

日期：2023-01-19 （星期四 農曆年廿八）
登記時間：5:30pm
放映時間：6:00pm
地點：SilverCity Riverport Cinemas, 14211 Entertainment Way, Richmond, British Columbia, Canada

將會有兩輪的售票安排:

第一輪 會員優先購票

2023-01-11 7:00pm 開始（需購買會員優先組合，每位會員最多2張門票）

a）一年會籍 + 街坊會 T-Shirt + 戲飛一張: $50

b）一年會籍 + 街坊會 T-Shirt + 戲飛二張: $62

第二輪 公開發售

2023-01-14 12:00nn 開始，普通位門票 $12 （每人最多購買4張）

註: 另加平台手續費

合辦：
Maiwei Picture
Niu Vision Media

鳴謝：
HK House
Connecting Community Services

「溫哥華街坊會會籍」 為2023年的全新計劃，成為會員將可享有熱門活動優先報名的機會，亦會與商戶合作以提供折扣等優惠，詳情街坊會將在官方網站及社交媒體稍後公佈。

想加入街坊會會員可以點做？做咗會員又有咩著數？㩒入上面購票條link就知㗎喇！

轉載自溫尼伯楓c9 Winnipeg Maple c9

【by 街坊ChiuB】

全世界嘅餐廳文化都好唔同，由食材到客人嘅文化，都可以有好大嘅差別。

香港曾經可以話係全世界攞貨最方便嘅地方之一。尤其係日本嘅海鮮，每日有飛機直送到香港。距離近、交通方便、人口密度高、去貨快；新鮮度同喺Winnipeg食到嘅日本海鮮，係不可同日而言，所以大家就唔好去比喇。但係食牛扒就加拿大多數好新鮮，所以又係唔好相題並論喇。

各國客人都係千奇百趣，有好客、亦有令人「另眼相看」嘅。一般理解，所謂嘅「西客」係指冇禮貌、冇邏輯、冇教養、冇同理心、貪錢攞著數……等等。

但亦有啲，係同文化差異、原居地思考模式有關。例如某些民族嘅客人會大叫「服務員」、叫到成枱嘢食又食唔哂、但又唔會打包。我理解，可能係某啲民族觀念係：「我俾錢你賺，你就係下人，所以就要聽我講。」而叫到成枱嘢食，而且只係食新鮮嘢，就可能係想話俾人聽我係非常豪爽，唔好當我係窮人、睇小我。

但喺北美一般嘅餐廳文化，你係唔會見到呢啲情況發生。

首先，喺北美你會見到服務員同客人有講有笑，互相交流。階級觀念相對某些地方弱。

呢個同北美嘅家教、價值觀都有關係。北美父母會鼓勵屋企少年人去餐廳、零售兼職，籍此親身體驗生活、學習待人處世、體會用自己手賺錢嘅滿足感同辛苦之處。所以好多人大個咗，對前線服務人員，都會有多啲同理心，因為自己都捱過。亦有小部份係已經生活無憂，志在有啲世藝，搵人吹水。加上喺學校，都教要尊重唔同嘅人。所以服務你嗰位真係乜背景都有，隨時可能係某大人物嘅仔女、老婆、親戚、好友。以禮相待，係尊重。亦無謂山水有相逢，公司夏天BBQ、聖誕派對咁啱撞到囉喎，就真係尷尬癌喇。

另外，北美餐飲業嘅前線營運模式亦同家鄉未必一樣。唔同人有唔同嘅崗位。門口帶位嘅係Host / Hostess ，但佢唔係你嘅服務員。主要負責執枱、擺枱、有時吓斟水、抹吓杯嘅係Busser / Bus person / Bus boy，佢都唔係你嘅服務員。

主要招呼你嘅係Server（Waiter/ Waitress) 。呢度每個Server會有自己要睇嘅枱，而未必係睇哂全場，多數係睇一個section。通常佢哋會先介紹自己。話俾你知佢今日會serve你，介紹今日有乜嘢Special ，問你飲乜（有啲地方有無限添飲汽水、咖啡，亦可以問清楚）。返嚟俾飲品你時，再去問你係唔係可以叫餐。有乜嘢唔食（例如荽茜、辣）、食物敏感亦係呢個時候講清楚。

正常情況下，客人會耐性去等佢哋自己張枱嘅Server回來再點餐、加水、埋單等等。係唔會好似遇溺係咁求救或者好似睇演唱會咁揮手。需要幫忙就等server經過問、以眼神接觸或係佢望過嚟時，輕輕舉手示意。

你隔離張枱好大機會係第二個server睇嘅，佢亦唔會太知你叫咗咩。所以如果有乜嘢要求，你就算搵第二個Server / Host / Bus Person，佢最後都係搵番你張枱嘅Server。如果乜都唔理、隨便叫人，其實係會費時失事。(亦因為北美的貼士文化，如果第二個人招呼你，要嗎要同其他人分貼士、或其他人招呼不周自己被扣貼士。所以都係盡量搵翻自己嗰枱Server均真啲。）

一般餐廳，北美客人亦普遍會打包佢哋食唔哂嘅食物。唔係錢嘅問題、係因為佢哋明白食物嘅重要，唔想浪費食物。其他人亦唔會覺得打包係寒酸，睇唔起人。反而如果叫得過份多，食唔曬，留低要倒，更容易令人反感。

至於喺北美俾貼士方面，疫情前最少10% （編按：溫哥華疫情前大都已經係俾15%），疫情加通脹後一般都俾15%。招呼唔錯、要求多嘅可以俾大概18-20%，有飲酒又可以俾多啲。如果非常周到又滿足哂你所有要求，就又可以俾多啲。你食得開心，又可以令其他人都開心。

對於北美以外人士（不單亞洲人，亦包括歐洲、澳洲人），有人會覺得俾貼士係浪費金錢、唔值、原居地冇貼士呢樣嘢、或者只係俾小小散紙當貼士。但北美文化係唔同。Server或Bartender 做得正路，但你唔俾貼士，佢哋會覺得好怪。「點解呢枱問乜個客都話好，但係冇貼士嘅? 」甚至覺得個客唔係幾尊重佢哋，殷勤努力但無回報。

因為實際上，對於很多服務員，貼士係佢哋主要嘅收入來源。可能有幾日多客、多貼士，之後有幾日好靜，貼士又唔多。所謂 「好天斬柴落雨燒」，正正可以形容餐飲業前線員工嘅寫照。（一定有人會話，咁應該餐廳加人工咪得。但係呢個貼士文化係全北美。餐廳加人工就要加價，一般顧客唔知就係睇餐牌價，覺得貴就會幫襯第二間。顧客亦寧願有得揀俾10%，多於一定要俾18%。改變一個洲嘅文化，唔係一件咁簡單嘅事。）

“Gratuity” 呢個字喺香港可能好少見，但喺北美三五成群到餐廳食嘢或者為訂大枱，就可能會見到“Gratuity”。Gratuity亦係貼士，以%計算，例如18%。但同一般沒有明文規定嘅貼士唔同，Gratuity係會喺張餐牌或單上註明，係一定要俾嘅。原因係餐廳需要協調人手去服務一張大枱，無論樓面或廚房，都要配合整個出餐過程，務求所有服務都可以一氣呵成，令客人可以同時用餐。付出多咗，便要落實有相應回報保證。

至於香港常見嘅Service Charge，我喺Winnipeg就好少見有餐廳收。服務費又唔同貼士：服務費係公司收嘅，未必會分俾員工。常見於酒店、非常高級餐廳或者一啲「特色食肆」。服務費對香港人嚟講應該唔會陌生，所以我都唔講太多。

去到一個新地方，除左去旅遊景點同博物館吸收當地文化外；到當地餐廳用膳，亦都係一個好好嘅選擇。除左可以品嘗當地菜式，亦可以貼地感受當地人用餐嘅文化。而且可能可以同本地薑有一個好好溝通嘅機會，所以我就好鍾意出街食飯……

當然… 我唔想煮同洗大餅，都係真嘅~~

圖片來源：
https://www.pexels.com/…/blur-breakfast-chef-cooking…/

【by 街坊甲】加拿大一向喺人權方面非常進步，係一個包容所有人嘅國家。呢兩年對得香港移民多，好在絕大部份接觸嘅街坊都好接納，有好多黎參加各種活動嘅同志伴侶亦好似我哋咁，大大方方人前人後都拖住手仔，唔會好似喺香港要諸多顧忌。

不過啦，一樣米養百樣人，總會遇上一啲奇芭，以下係街坊甲嘅少少經驗：

1. 華人教會非常保守：有人退會仲寄經文畀我（大家應知邊兩段）叫我快啲悔改

2. 老一輩男同志問我：咦你個街坊會唔係得自己人？咁我唔入黎啦 bye bye

3. 三十好幾男同志話：唔想嘥錢喺你哋啲活動，我淨係鍾意群埋啲廿零碎同志玩

黎到加拿大，仲仍然信香港果套神嘅教誨，其實有無睇到周圍啲教會貼晒彩虹貼紙？同志自己都唔係磨菇嘅，既然多數人都接受不同性向，點解仲要自己獨處一隅唔肯入世？作為同志，既然唔想人地歧視，自己又有 N 種形式嘅歧視，只係喺度自打嘴巴，亦絕對唔係街坊會應有嘅精神。

所以我都好想重申下，街坊會既然有「傳承、接納、共融」呢個口號，接受得加拿大價值，我哋會繼續接受所有不同性向、不同性別、不同年齡嘅香港人，亦好希望來年能夠帶街坊參與各種性向嘅活動，令大家可以有一個認識對方嘅機會。

好開心廿幾位街坊參加咗日前喺 Marpole Snackshot 糖百府 舉行嘅街坊Artjam + 糖水會！好榮幸請黎 Art For Life Studio 臻活藝坊 嘅 Harvey Chan 擔任水彩畫導師，仲即場示範埋添！個個話自己唔識油但係個個都畫得好靚喎！大家好鍾意食啲糖水，特別係咖喱魚蛋～多謝糖百府提供場地！