溫哥華行山點玩好
vankaifong
係香港人群組裡面有新朋友講起行山。北美咁大地方，講到山野景致，同洛基山脈接壤嘅州份同省份真係得天獨厚。成個BC地方超大超靚，唯一嘅問題係唔夠錢唔夠時間唔夠體力，唔係淨係BC省都玩唔完。
由於BC可以去嘅地方實在太豐富，自己見識都唔算特別廣闊，我就只係集中講下係大溫地區一日之內行得完嘅短線路程可以點去。以下面所講既估計時間，喺用慢腳，比較保守嘅時間估計。實際時間最好自己調查一下距離同爬升，再根據自己過往經驗作為調整。
最簡單方便經濟實惠，一開始一定係北溫。而且因為有Cypress, Grouse同埋Seymour 三大滑雪場加持，好多靚山由停車場出發都可以偷雞行少一大截。例如由Seymour Parking出發，一條幾乎平路行去Dog Mountain喺輕鬆之選。再唔係行去Mt. Seymour 既First and Second Peak 都係5，6個鐘頭來回。
Grouse 主要係上Goat 同Crown Mountain，雖然水平距離只有三幾公里，但係難度不小。由山頂纜車站出發八小時來回都好正常。路線比較濕滑同有泥濘，建議等雨水比較少，路面乾爽時候更加適合。
Cypress選擇就更加多。Eagle Bluff相對比較容易去，但係即使往北走，去到打卡聖地St. Marks Sunmit亦都只係三，四個小時來回。Cypress係Howe Sound Trail起點，如果一直行，去到Lions同Brunswick都可以。但係呢兩個山難度都唔少，體力不足嘅就絕對唔建議，而且如果只係一日行程，就只係夠時間攻克一個山頂，都係逐個去啦。
另一個更加由容易到最困難都有得玩嘅路線就係Lynn Valley。由Lynn Valley Road入，往南走就係Rice Lake同埋本地人先去，唔使收錢嘅吊橋。山谷嘅景致非常漂亮，而且盛夏嘅時候河谷嘅水亦都唔會太凍，好多人去玩水。其中一個支線就係上Lynn Peak。路線唔長但係爬升非常厲害。可以想像係特別進階版嘅Grouse Grind。一般人來回之後都會腳軟。
直接北上，七公里距離就係Norvan Fall。一個非常漂亮而且可以走到瀑布底下既路線。雖然唔算難，但係距離相對長，小朋友未必有足夠體力完成全程。係Norvan Fall旁邊，就係上去魔王級既Coliseum Mountain。Coliseum 其實同Lions及Brunswick差唔多難度，問題就係加上Norvan Fall呢一段十幾公里來回，就唔喺咁多人做得到。年年都有人要人救落山，所以要準備充分先至好試。
其實都未講完，不過我諗分開下一集先至講其他更加容易同適合一家人去嘅路線。但係一定要同大家講，行山一定要有所準備。以上介紹嘅路線全部都係本地非常熱門，基本上一定會遇到行同一條路線嘅山友。有事坐定唔好亂咁走，總會有人幫到你。畢竟BC山體比香港大得多，搜救好需要時間，而且亦都要對野生動物有所防範，所以有關準備我諗又係要另外開一節出來講。
以上路線，有車既話係相當容易去。比起其他省份，一個鐘頭都唔駛嘅駕駛距離已經可以去咁靚既山其實係難以想像。不過有好多新嚟嘅朋友未有車，咁就比較棘手。當然如果呢個群組入邊有朋友去，跟車一齊上係唔錯，不過要夾啱又唔喺咁容易。大家可以試下加入一啲本地行山群組，周不時都會有好心嘅朋友，橫豎出車重有兩個位，就會問有冇人想跟埋去。通常參加嘅人都係自己冇車，咁就可以約喺溫哥華某啲地鐵站外面等，好多時都係比返十幾廿蚊油錢當做謝禮就可以。
不過，同陌生人同一架車上山係有一定風險，所以要自己研究下嗰個信唔信得過，如果出到黎變成喺孤男寡女當然就可免則免。另外可以用car sharing，偶然一日用下車嘅朋友係一個好選擇。
BC Hiking and Adventure Group
https://www.facebook.com/groups/808903849314933/?ref=share
希望哩個群組多啲人搞行山會，可以帶到多啲朋友去睇享受一下Beautiful British Columbia。
