奬學金的背景

街坊會成立近三年，一直以來都以壯大港人社群和支持新抵埗港人落地生根，盡快融入成為港裔加拿大人為目標。去年在註冊成為非牟利團體後有舉辦電影首映會等活動，感謝社區人士及商戶支持，令我們籌集到一些資金，旨在讓街坊受益。我們舉辦活動時首要考慮的是活動背後的意義，而活動費用亦是我們考慮的重點之一。我們盡量會用較貼地的方式舉辦活動以降低成本，讓街坊不至因經濟原因而卻步。

奈何近年物價急速上漲，生活成本倍增，我們舉辦的活動亦要調整收費以避免虧損。就如今年春季舉辦的 Stave Falls 和 Fort Langley 旅行，除了玩樂也可以了解本省的歷史，極具教育意義。不過由於要乘坐旅遊巴，活動收費自然比較高，亦確實令到一些未有經濟能力的街坊(如全職學生)卻步。我們義工內部商討使用籌得資源補貼一些活動時，就有人提出效法海外港人和其他族裔團體，推出獎學金，直接提供經濟援助更爲了當，「溫哥華街坊會新抵埗港人獎學金」因此誕生。

按街坊會的財務狀況，兩份獎學金的金額原本為$500，到開始籌劃獎學金時，幸得有心人士捐助，才令每份獎學金金額倍增至$1000！

獎學金的詳細資訊

✅ 你必須滿足以下所有要求

• 在過去5年內抵達加拿大
• 出生和/或在香港長大
• 目前居住在加拿大BC省
• 在加拿大BC省完成至少一個學期的全日制大專課程
• 目前是加拿大BC省的全日制學生

✨ 選拔標準

• 學業表現優秀，至少達到GPA 3分以上 (4分滿分)
• 積極參與加拿大社區活動
• 你在加拿大的貢獻和義工經驗

📄 在申請時必需要遞交以下文件 (請參考FAQ以獲得更多資訊)

• 成績單 Transcript （最近期的）
• 履歷表 Resume （最多2頁）
• 提交一篇英文文章，題目為「Settling in Canada: How do you see yourself contributing to your new home?」（最多1,000字）

🕰️ 時間表

• 申請必須在11月9日溫哥華時間23:59之前遞交
• 委員會會在2023年11月下旬聯繫入圍者
• 獎學金獲獎者將於2023年12月2日的溫哥華街坊會年度晚宴上宣布

🏆 獎學金內容

#生活日常 香港人開電話卡常見問題 by 小希

小編前幾日要幫一個新來嘅香港留學生搞電話卡📞，但係原來佢遇到唔少問題！所以透過今次幫人開電話卡嘅經歷，歸納咗香港人開電話卡嘅常見問題❗️。

🇨🇦加拿大全國都有業務嘅主要公司有三間，分別係Rogers, Telus同Bell，而呢三間公司旗下都會有兩間子公司，Rogers擁有Fido同Chatr，Telus擁有Koodo同Public Mobile，而Bell就擁有Virgin Mobile同 Lucky Mobile。而加拿大其實都有其他電訊公司，喺部份卑詩省其實有間電訊公司叫Freedom，至於用三大網絡嘅虛擬電訊公司主要有PhoneBox同埋中國電信，其他公司唔建議考慮🙅🏻‍♂️。
咁樣儲值咭同埋月費計劃有咩分別？儲值咭就係先入一定嘅金額，然之後選購套餐之後再每個月扣錢。月費計劃就係使用服務之後先至每個月俾錢。電訊公司會就開台查詢個人信貸紀錄。未滿19歲嘅小朋友，冇家長嘅陪同下係冇得開設月費計劃，咁唯有只可以申請儲值卡，儲值卡無需信貸檢查。

唔同電訊公司有啲咩特色？
Fido嘅優點係行山🏔️訊號最強，同埋有五個鐘免費任用數據。
Virgin有個會員計劃出街食飯睇戲🍽️🍿會有折扣。
中國電信嘅優點係免費任意撥打中國🇨🇳同埋香港🇭🇰同埋去到中國大陸可以用返加拿大嘅數據計劃。
Koodo就係計劃入邊可以任揀一個增值服務，例如數據滾存服務同埋1000分鐘免費長途電話服務，而長途電話服務係包香港嘅。

而儲值卡計劃方面，小編就建議使用Public Mobile同埋Freedom，呢兩個電訊公司會比其他純儲值咭電訊公司例如Chatr同Lucky價格相宜啲🤑，但缺點係冇包增值服務，例如長途電話、數據滾存或者備用數據。

咁點樣買電話卡？加拿大可以實體商舖同埋網上購買。實體商舖嘅好處係職員可以解答你嘅問題同埋唔跟官網嘅價錢，而網上購買就可以足不出戶辦理手續同電話卡會寄到去你登記嘅地址。

#電訊服務 #儲值咭 #月費計劃

[本文是小編舊年所寫，今年再加多少少資料]

如果大家有留意的話，3月下旬白色的染井吉野櫻花開花落到長出綠葉的兩三個星期之後，好像失去了色彩一樣，不過不要緊，4月中後段迎來另一個稍遲開的櫻花關山櫻，其一簇簇粉紅的花群，遍佈整棵樹，非常搶眼奪目。(小編按：2023年3、4月依然非常寒冷及多雨，所以所有櫻花都推遲了，而關山櫻也終於在4月尾綻放）

關山櫻樣子跟3月常見的白色的染井吉野櫻花完全不同，特徵係呈深粉紅及淺粉紅，每朵花起碼有二十多片花瓣，一群內起碼有5 朵花，而且不像染井吉野那般花瓣一搖一大雨就落下，比較耐看。櫻樹普遍較大，如果在內街兩旁種植的話，就可以形成一個很壯觀的櫻花隧道。

趁著這幾天天氣尚好，小編介紹一下我所知的關山櫻熱點等各位街坊可以捉緊賞櫻的尾班車。

串連 Dumfries Street 夾 28 至 32nd Ave 三條街在路旁的關山櫻，整條街都被一簇簇的櫻花覆蓋著，如同一條櫻花隧道般，非常誇張。最有趣是，如果你由33rd Avenue 行入去，在迴旋處那裡向北望，你會覺得整條前路都被櫻花包圍住，因為去到約30th Avenue 條路會走向下坡，所以你就見到再前面的樹頂的櫻花。沒有車的街坊只需坐33 號巴士到 Knight 街 Kensington Park 下車行幾步就到。

在 Main 街大約由 59th Ave 開始至大約 63rd Ave，每隔一邊都有關山櫻的蹤跡。內街比較闊所以比較沒有 Dumfries 那邊遮天閉日的景象，但一樣是非常壯觀。由於種植的方向是東西方向，所以日落時份向太陽方向拍攝會有很漂亮的光影效果。沒有車的街坊可以很方便坐3 號巴士就去到。

最近大家都在新聞中見到加拿大 NEXUS 的 Enrollment Center 關閉3 年後重新開放，但其實大家知不知道 NEXUS 是甚麼東西？取了NEXUS又有甚麼好處？小編同住在加拿大一段時間的朋友傾開，其實都唔係好多人知道或取得 NEXUS，所以都想講解一下。

來了溫哥華一段時間的街坊相信都有機會去美國，尤其我們大溫哥華任何地方去邊境都最多只要 1 小時左右，只需再多 2 小時左右車程的西雅圖或波特蘭都是熱門的短遊地點。又或者，走一轉 Bellingham 入油及購買日用品都可能會比在加拿大便宜及有更多選擇。

不過大家可能會知道如果經陸路關口如在White Rock 附近的 Peace Arch 過美國的話，排隊過關係非常困擾，就算你早至 9 時左右到這裡，過關亦可能要近一小時，小編自己亦曾呆坐車中等了差不多兩小時才過到關，如果你拎住 US Visa 就可能要更耐。

因此，美國政府同友好國家推出了一系列 Trusted Travelers Programs（TTP)，如 NEXUS 就是針對加拿大公民及永久居民快速出入美加的方案。透過「預先批核」低風險的旅遊人士，使他們能夠在邊境不用核查護照就可以進出美加，幾近完全不用排隊。

小編早兩日去咗間幾特別的餐廳，特別嘅唔係食物或裝潢，而係佢係一間教學的餐廳，講緊嘅係Vancouver Community College 嘅 JJ’s Restaurant。

每星期二、三及四晚上 6:30 都有 fine dining setting 嘅 Chef’s Table，食物的預備、煮調、擺盤、服務全都是學員一腳踢合力完成，導師在場指導。唔好以為佢地係學員就揸流攤，食品同服務都有板有眼，當然同真正的 fine dining experience 有段距離，但作為學員來講，所有野都合格有餘。

$55 有五道菜，菜式係餐廳自己設計（即係 Omakase 啦），每次都不盡相同，而每道菜都非常精緻，可以睇得出佢地都幾花心思去設計。

今晚的第一道係粉狀的 Foie Gras 配 peach puree，食起來口感很特別的鵝肝，起碼我真係未試過這樣子的鵝肝。

第二道係將煙三文魚用很薄的帶子捲住，配上羅勒醬汁，很醒神的一道前菜。

第三道係鹿肉配上有牛尾精華的tart，鹿肉很嫩滑，慢煮的程度很適中，不過那個 tart 仲好，味道很豐富，其實我都估唔到到底裡面有甚麼，只知道係燉牛尾的精華。

第四道係羊二食，中間係羊肩肉，右面係用煙肉捲住羊肉再煎，兩種不同味道，很有趣。左面係疊起的白蘿蔔，唔知係咪吸收了醬汁所以味道濃郁。

最後的甜品係 Tiramisu 加 咖啡雪糕，兩件都係餐廳自家製作的，Tiramise 做得唔錯，可惜雪糕比較平淡。

雖然作為 fine dining 佢同真 fine dining 都仲有一段距離，但以 $55 來講唔算貴，而且當係俾實際工作經驗同鼓勵學員係值得支持，話唔埋你以後會見到佢地出來會獨當一面也不定呢。

留意你可以俾小費，小費係會俾番學校作支援 VCC Foundation fund。如果未能安排晚餐的話，JJ’s Restaurant 都有午餐，$35 三道菜，亦是由學員合力營運的。

昨日（2月7日） BC 省政府宣布今年9月30日的 National Day for Truth and Reconciliation（真相及和解日）為正式的假期。真相及和解日在2013 年設立，用以悼念印第安人（原住民）寄宿學校遇難的學生。在2021年，因為在Kamloops 市及其他地方陸續發現這些寄宿學校的宿生的無名墓地，聯邦政府就在同年將這日定為聯邦法定假期。這日又叫橙衣日，出處係來自 Phyllis Jack Webstad 這位原住民作家，她在書中寫到她入寄宿學校第一日，學校就沒收了她的衣服，包括她祖母送的橙色襯衫，而之後就沒有歸還。因此，橙色襯衫成了寄宿學校強迫同化原住民兒童的標誌。所以在這天，請盡量穿著橙色衫以表悼念。

不過小編唔係想講這個假期，而係點解聯邦政府在兩年前已定了假期，但本省又再做一次？

對新來的街坊來講，加拿大的公眾假期(statutory holiday) 係好奇怪的。大節日如聖誕新年國慶這些，當然好明顯會放，但復活節後的星期一就沒有假放。又如一些假期好像家庭日 (2月）或 卑斯日（8月）又不是全國的假期。又如上面所講的真相及和解日，你會發現有些人放假有些人又沒有，那究竟是甚麼一回事？

原來加拿大的公眾假期係分聯邦政府的頒佈的假期及省政府頒佈的假期，而你要跟隨的所謂公眾假期，其實係因你所在的省份同行業而定。真真正正全國上下都會放假的公眾假期就只有5 日：

• 新年（1月1日）
• 耶穌受難日（春分月圓之後第一個星期日是復活節，之前的星期五）
• 國慶（7月1日）
• 勞動節（9月第一個星期一）
• 聖誕節（12月25日）

而餘下的假期，如果你係 聯邦政府管轄的行業僱員 （federally regulated industries) ，咁你可以放的公眾假期就係下面（可以參考番稅局網頁）：

• 維多利亞日（5月25日之前的星期一）
• 真相及和解日（9月30日）
• 感恩節（10月第二個星期一）
• 和平記念日（11月11日）
• 拆禮物日（12月26日）

[註] 復活節後的星期一及公民日（8 月第一個星期一）並不包括在聯邦政府管轄的行業 Canada Labour Code 中，但聯邦政府提供的服務辦事處通常都會放。

聯邦政府管轄的行業包括所有聯邦政府提供的服務，以及銀行、機場、鐵路、廣播等提供基本服務的行業。其餘私人機構就由省政府去立法決定那些日子是正式公眾假期。所以，你就會有一個印象係有些假是某些人有得放，有些假就全部人都放的奇特現象。

咁因為街坊會是身在卑斯省，所以以下的假期就是我們必定會放的假期（即是名正言順番工有補水、放假有當日正常人工），參考呢度：

• 新年（1月1日）
• 家庭日（2月第三個星期一，留意這日不是聯邦的假期）
• 耶穌受難日
• 維多利亞日（5月25日之前的星期一）
• 國慶 （7月1日）
• 卑斯日（8 月第一個星期一，同公民日同一日）
• 勞動節（9 月第一個星期一）
• 真相及和解日 （9 月30 日）
• 感恩節（10月第二個星期一）
• 和平記念日（11月11日）
• 聖誕節（12月25日）

要留意其他省份係有機會唔同的，所以你應該參考番該省政府的資料。係咪終於都明白幾時放假，幾時唔放未呢？

估唔到過去一年喺全義工嘅營運之下，竟然可以舉辦成 56 個活動，服務咗 15,000 人次嘅新舊移民！好多謝超過 50 位義工嘅貢獻超過 3,131 小時，街坊會先至可以能夠有能力去幫到新黎嘅香港人。

大家一齊畀啲掌聲我哋嘅所有義工，仲有下次活動見到義工嘅時候，記得同佢哋講聲多謝呀！

我哋更加歡迎大家加入義工，有興趣嘅話可以填寫以下表格成為義工嘅一員！
https://forms.gle/TtEJCBAXiAm2GjaF7

by 會長 Henry

呢輪為《毒舌大狀》北美首映搵贊助嘅時候，有時對方都會問我：

「你係咪全職搞街坊會？」

街外靠同路人維生者眾，好難怪人哋以為我搞呢個會都係為咗搵著數。之前我嘅香港人鄰居都聽我解釋咗好耐，至肯相信我真係「無好處都去搞街坊會」。

講真，我埋頭搞咗兩年，又真係無乜機會同街坊分享我嘅真正職業。我其實係一個全職自由業認證翻譯員。搞街坊會主要因為我自問有能力、抽到時間、經濟上又容許我任性（多謝老公）、同埋我知道自己定嘅方向（睇返我地口號「承傳、接納、共融」）係能夠幫到甚至改變到香港人社群嘅。

今年開始，街坊會進入咗一個新階段：成為一個註冊 NGO（呢度其實叫 not-for-profit）組織。我、Guy 仲有同屬元祖級成員嘅 Jacky 三位成為首屆 Directors。註冊街坊會主要係為咗三樣嘢：

一、名份：要認真去搞呢個平台，始終都要有個正式嘅組織登記。除左可以擁有官方銀行戶口，需要多一個人簽名管數、申請各級政府同機構資助、有名義同本地機構合作、租場平啲、買保險又平啲，仲可以為新移民義工寫推薦信，證明佢哋有加拿大嘅本地經驗，何樂而不為？

二、開支：我哋成日好想做年度計劃，但無資源之下，永遠只能見步行步。兩年黎一路以「零筆直」運作其實真係好攰。另外，文具、器材、租場地、物資、未來希望俾到嘉賓嘅車馬費、運輸、儲存、租地址、行政申請費等樣樣都係錢，義工借出、拉上補下、甚至要倒貼亦對佢哋唔公平；而且，我亦唔想街坊會被貧窮限制想像，希望做到多啲長期活動或者更容易負擔嘅活動去畀街坊參與。口號「承傳、接納、共融」唔係白嗌，但係要做嘅嘢係好多好漫長，無足夠資源可能只會令個會原地踏步。

三、義工：我喺加拿大做義工果陣，每次對方一定問你要唔要返車費，送件 T Shirt 畀你著係基本，間中仲有 pizza 食，活動完左仲有 appreciation dinner 免費擦一餐。雖然我唔介意貼錢搞活動（黎緊慶功宴又係我哋三個 Directors 私人請），但唔代表其他義工都應該好似我哋咁駛錢，尤其未必有太多錢嘅新移民，一路已經付出心機、時間不特止，仲要出埋車錢、飯錢、仲要照俾活動費用。我相信，義工應該有相應嘅認可先至留到人，街坊會將來先可以有人肯承接。

今次街坊會好好彩得到電影發行邀請合辦首映，亦都係一個契機可以俾社區同街坊分擔我哋嘅付出；另外一樣嘢係，街坊會既然有官方地位，咁就可以試行「會籍計劃」，等付出少少會費參加計劃嘅街坊，可以享用到本地商舖提供嘅優惠，撐起香港人嘅經濟圈，壯大香港人社群，呢啲錢亦可以每年幫街坊會喺財政上「打底」。

多謝街坊一路以黎嘅支持同信任，好希望黎緊嘅首映同埋其他活動可以見到大家。如果大家有任何實在嘢（例如迷你倉、會計 etc）可以支持街坊會，亦可以 DM 我哋。

今年的 Dineout Vancouver 會在1月20日開始至2月5 日，這個每年年頭餐飲業淡季而衍生的節目已經超過20年歷史，而且是加拿大其中一個大型的飲食節。

參與的餐廳都會自訂一個比正價便宜的套餐（通常都係3 course）作招徠，而內容通常都是餐廳最出名的食品，原則上就算是一個小型的 Tasting Menu。對唔會經常出外用膳嘅食客來講，以便宜1/3 至半價的價錢試到比較高檔次的餐廳如 Bacchus、Black + Blue 的菜式其實都划算。不過今年大部分高檔餐廳訂價是 $55 至 $65 一位的 3-course 套餐，老實講比之前一兩年貴了不少。當然，裡面仍有很多平民的選擇，如連鎖店Earls、Tap & Barrel、Cactus Club 等都有 $40 以下的晚餐 。

此外，Dineout 亦會舉辦一些特別的event，數年前小編參加過 Vancouver Aquarium pop-up，食物講不上驚喜，不過當去水族館一遊亦不錯。可惜在唔係在水族箱前用餐，否則其實可以變成一個話題打咭的 event。

今年第一年有米芝蓮，但有參與 Dineout 的一星餐廳就只有 Main 街的 Burdock & Co.，可能其他的已忙到不用Dineout 去招徠客人吧。

小編早幾年都會特地 book Dineout的餐廳，但年復一年 Dineout 期間餐廳都因為客人太多而令食物及服務質素都變得參差，所以現在實在不寄厚望或傾向 Dineout 完結前才去（部分餐廳會在完結後依然提供 Dineout 套餐的）。

各餐廳Dineout menu，訂位同查看特別event 可看官網：

https://www.dineoutvancouver.com

（截圖來自官網）

轉載自溫尼伯楓c9 Winnipeg Maple c9

【by 街坊ChiuB】

全世界嘅餐廳文化都好唔同，由食材到客人嘅文化，都可以有好大嘅差別。

香港曾經可以話係全世界攞貨最方便嘅地方之一。尤其係日本嘅海鮮，每日有飛機直送到香港。距離近、交通方便、人口密度高、去貨快；新鮮度同喺Winnipeg食到嘅日本海鮮，係不可同日而言，所以大家就唔好去比喇。但係食牛扒就加拿大多數好新鮮，所以又係唔好相題並論喇。

各國客人都係千奇百趣，有好客、亦有令人「另眼相看」嘅。一般理解，所謂嘅「西客」係指冇禮貌、冇邏輯、冇教養、冇同理心、貪錢攞著數……等等。

但亦有啲，係同文化差異、原居地思考模式有關。例如某些民族嘅客人會大叫「服務員」、叫到成枱嘢食又食唔哂、但又唔會打包。我理解，可能係某啲民族觀念係：「我俾錢你賺，你就係下人，所以就要聽我講。」而叫到成枱嘢食，而且只係食新鮮嘢，就可能係想話俾人聽我係非常豪爽，唔好當我係窮人、睇小我。

但喺北美一般嘅餐廳文化，你係唔會見到呢啲情況發生。

首先，喺北美你會見到服務員同客人有講有笑，互相交流。階級觀念相對某些地方弱。

呢個同北美嘅家教、價值觀都有關係。北美父母會鼓勵屋企少年人去餐廳、零售兼職，籍此親身體驗生活、學習待人處世、體會用自己手賺錢嘅滿足感同辛苦之處。所以好多人大個咗，對前線服務人員，都會有多啲同理心，因為自己都捱過。亦有小部份係已經生活無憂，志在有啲世藝，搵人吹水。加上喺學校，都教要尊重唔同嘅人。所以服務你嗰位真係乜背景都有，隨時可能係某大人物嘅仔女、老婆、親戚、好友。以禮相待，係尊重。亦無謂山水有相逢，公司夏天BBQ、聖誕派對咁啱撞到囉喎，就真係尷尬癌喇。

另外，北美餐飲業嘅前線營運模式亦同家鄉未必一樣。唔同人有唔同嘅崗位。門口帶位嘅係Host / Hostess ，但佢唔係你嘅服務員。主要負責執枱、擺枱、有時吓斟水、抹吓杯嘅係Busser / Bus person / Bus boy，佢都唔係你嘅服務員。

主要招呼你嘅係Server（Waiter/ Waitress) 。呢度每個Server會有自己要睇嘅枱，而未必係睇哂全場，多數係睇一個section。通常佢哋會先介紹自己。話俾你知佢今日會serve你，介紹今日有乜嘢Special ，問你飲乜（有啲地方有無限添飲汽水、咖啡，亦可以問清楚）。返嚟俾飲品你時，再去問你係唔係可以叫餐。有乜嘢唔食（例如荽茜、辣）、食物敏感亦係呢個時候講清楚。

正常情況下，客人會耐性去等佢哋自己張枱嘅Server回來再點餐、加水、埋單等等。係唔會好似遇溺係咁求救或者好似睇演唱會咁揮手。需要幫忙就等server經過問、以眼神接觸或係佢望過嚟時，輕輕舉手示意。

你隔離張枱好大機會係第二個server睇嘅，佢亦唔會太知你叫咗咩。所以如果有乜嘢要求，你就算搵第二個Server / Host / Bus Person，佢最後都係搵番你張枱嘅Server。如果乜都唔理、隨便叫人，其實係會費時失事。(亦因為北美的貼士文化，如果第二個人招呼你，要嗎要同其他人分貼士、或其他人招呼不周自己被扣貼士。所以都係盡量搵翻自己嗰枱Server均真啲。）

一般餐廳，北美客人亦普遍會打包佢哋食唔哂嘅食物。唔係錢嘅問題、係因為佢哋明白食物嘅重要，唔想浪費食物。其他人亦唔會覺得打包係寒酸，睇唔起人。反而如果叫得過份多，食唔曬，留低要倒，更容易令人反感。

至於喺北美俾貼士方面，疫情前最少10% （編按：溫哥華疫情前大都已經係俾15%），疫情加通脹後一般都俾15%。招呼唔錯、要求多嘅可以俾大概18-20%，有飲酒又可以俾多啲。如果非常周到又滿足哂你所有要求，就又可以俾多啲。你食得開心，又可以令其他人都開心。

對於北美以外人士（不單亞洲人，亦包括歐洲、澳洲人），有人會覺得俾貼士係浪費金錢、唔值、原居地冇貼士呢樣嘢、或者只係俾小小散紙當貼士。但北美文化係唔同。Server或Bartender 做得正路，但你唔俾貼士，佢哋會覺得好怪。「點解呢枱問乜個客都話好，但係冇貼士嘅? 」甚至覺得個客唔係幾尊重佢哋，殷勤努力但無回報。

因為實際上，對於很多服務員，貼士係佢哋主要嘅收入來源。可能有幾日多客、多貼士，之後有幾日好靜，貼士又唔多。所謂 「好天斬柴落雨燒」，正正可以形容餐飲業前線員工嘅寫照。（一定有人會話，咁應該餐廳加人工咪得。但係呢個貼士文化係全北美。餐廳加人工就要加價，一般顧客唔知就係睇餐牌價，覺得貴就會幫襯第二間。顧客亦寧願有得揀俾10%，多於一定要俾18%。改變一個洲嘅文化，唔係一件咁簡單嘅事。）

“Gratuity” 呢個字喺香港可能好少見，但喺北美三五成群到餐廳食嘢或者為訂大枱，就可能會見到“Gratuity”。Gratuity亦係貼士，以%計算，例如18%。但同一般沒有明文規定嘅貼士唔同，Gratuity係會喺張餐牌或單上註明，係一定要俾嘅。原因係餐廳需要協調人手去服務一張大枱，無論樓面或廚房，都要配合整個出餐過程，務求所有服務都可以一氣呵成，令客人可以同時用餐。付出多咗，便要落實有相應回報保證。

至於香港常見嘅Service Charge，我喺Winnipeg就好少見有餐廳收。服務費又唔同貼士：服務費係公司收嘅，未必會分俾員工。常見於酒店、非常高級餐廳或者一啲「特色食肆」。服務費對香港人嚟講應該唔會陌生，所以我都唔講太多。

去到一個新地方，除左去旅遊景點同博物館吸收當地文化外；到當地餐廳用膳，亦都係一個好好嘅選擇。除左可以品嘗當地菜式，亦可以貼地感受當地人用餐嘅文化。而且可能可以同本地薑有一個好好溝通嘅機會，所以我就好鍾意出街食飯……

當然… 我唔想煮同洗大餅，都係真嘅~~

圖片來源：
https://www.pexels.com/…/blur-breakfast-chef-cooking…/