溫哥華街坊會三周年聚餐喺2023年12月2日已經圓滿舉行，今次總共有超過130人參加，非常熱鬧。除咗歌唱表演，我哋仲有50/50抽奬同silent auction，大家都反應非常熱烈。

而令我哋能夠提供到拍賣品或獎品俾大家、同埋令我哋可以用低過成本價賣飛俾大家嘅背後功臣就係我哋嘅贊助商 ！所以我哋都想再一次鳴謝返咁多位贊助商，亦希望大家可以支持呢一班有心嘅港人商戶，繼續壯大我哋嘅港人社群！

• 鑽石贊助：852 Kitchen
• 金贊助：Hayman Tam 溫哥華理財顧問 – Wealth First Financial
• 銀贊助：Dr. Marco Ka Wing Chung
• 銅贊助（排名不分先後）：
  Buyship Express Canada
  Image Sense
  RJ Motor-Tech
• 禮品贊助（排名不分先後）：
  ALOT Living Canada
  Bodega Pets Foods and Supply
  CannyYoga
  GIFTS & TAKE by Oily Mame
  Itchyichi
  Little Candle Matters
  OSIM Canada
  SenchaMatcha
  飲湯思源

另外亦要多謝糖百府送上精美嘅十三么椰汁糕慶祝街坊會三周年快樂！最後我哋再次多謝各出席嘉賓、scholarship得奬者、表演嘉賓Tiffany Ma、贊助商戶、同埋勞苦功高嘅義工籌委，當然更感激所有出席嘅街坊支持，希望下年可以再次見到大家！

多謝CHOK Muay Thai Gym Mark師傅主持呢個泰拳體驗班，教授咗好多基本嘅泰拳知識俾大家。所有街坊都出咗唔少汗，大家都玩得好開心。

如果你都想參加街坊會嘅活動，記得登記成為會員，咁就會收到最新活動消息，仲可以第一時間報名添！

第二次嘅香港人社區空間活動嘅反應非常熱烈！近50人黎到參加交流，一路食pizza一路結識新朋友，見到好多新街坊都學到加拿大生活小技巧主動出擊交談，邁出新生活嘅第一步真係非常令人開心！同場亦有唔少舊街坊專程黎到希望認識下新黎嘅香港朋友，伸出咗互助第一步。

當然戲肉就梗係街坊 Guy 嘅加拿大法語文化講座喇！雖然好多街坊都扮唔識，但係其實有啲都講得兩下嘅！希望今次係一個好嘅開始，等大家可以學到加拿大嘅第二語言。

Miss咗？唔緊要，我哋有 IG LIVE: https://www.instagram.com/p/CuxkuIthK-M/

立式單槳衝浪嘅活動喺7月11號順利進行！天公造美天氣夠熱，大家都玩得好盡興。有不少街坊係第一次玩，原來要企起身黎划艇一啲都唔容易㗎！不過跌多幾次就慢慢習慣到點樣平衡，難唔到香港街坊嘅。之後我哋喺佢嘅附屬餐廳一路食嘢，一路欣賞溫哥華嘅景色。有機會大家都可以黎食下嘢，扮下有錢人。

提提大家，呢度星期一至三有半價租船優惠！

詳情可以自行聯絡 Windsure Adventure Watersports

7月8號當日我哋一行廿多人參加館方特別提供嘅廣東話導賞團，重點介紹返歐洲移民黎到溫哥華前嘅一段原住民嘅歷史，同埋我哋應該點去看待佢哋現有嘅文化。

感謝 Museum of Vancouver 為參與嘅街坊提供咁多有意義嘅資料，等新黎嘅香港人都可以瞭解更多關於新居住地背後嘅故事。

喺6月25號我哋一行三十幾人再度造訪 Mount Seymour，希望行到 Dog Mountain Trail。可惜天氣仍然未夠熱，路段仍然封閉。不過我哋都行到能夠飽覽全大溫景色嘅山頂，大家都好開心影咗好多相！希望下年可以行得到 Dog Mountain 啦！敬請留意我哋未來嘅行山活動

相片Credit：@lonelycloud93、Miss Y

我哋第一次嘅「香港人社區空間」已經喺六月十一日假本拿比 Tommy Douglas Library 嘅社區1號室完滿結束。

溫哥華街坊會由兩年多前開始，已經舉辦多個活動及講座，基於疫情所限多數活動只能透過網上進行。呢次係「香港人社區空間」第一次同各位街坊以實體方式交流。

「香港人社區空間」顧名思義，係溫哥華街坊會爲香港人所設嘅一個社區空間。目的除咗係提供所有街坊一個機會去互相認識、擴闊人脈、鼓勵街坊互助，發揚街坊會精神之外，亦會邀請嘉賓提供針對同新移民相關議題嘅講座，希望能進一步令新街坊更容易適應加拿大溫哥華呢個新環境同享受新生活，秉承街坊會嘅宗旨：傳承、接納、共融。

除左歡迎新義工，當日亦有任職電工嘅義工 Way 替人修理小家電、中醫師 Dennis 講解身體各種痛症及治療方法，另外身爲父母嘅街坊Rachel 分享心得，協助改善親子相處方式。鳴謝 飲湯思源 送出湯包特別禮盒裝畀嘉賓。

溫哥華街坊會係非牟利機構，一切運作都係靠義工慷慨出力支持，今次嘅「香港人社區空間」亦好歡迎同多謝新參加嘅義工，一齊壯大香港人社群。

6月3號我哋一行二十位街坊參加咗華埠掌故館同埋由掌故館職員帶領嘅唐人街導賞，真係知多咗好多華埠嘅歷史，仲聽到一啲關於唐人街嘅冷知識添！今次係華埠掌故館為我哋街坊會特別安排嘅導賞團，除咗參觀咗富有故事性嘅華埠掌故館，仲參觀咗獨家景點陳潁川堂同沿住唐人街一邊行一邊聽故仔。華埠掌故館嘅入面一切都好有心思，例如用好多故事去帶出個歷史，又有豐富嘅展品，仲有AR 技術同體驗一下喺周耀初影相館影相，要逐樣睇哂真係要下次再去先得喇。之後我哋去咗隔離嘅陳潁川堂，參觀不同嘅活動室同埋文物館，而好多人最鍾意嘅就係嗰個中西合璧嘅大禮堂，特別係個圓拱形彩色天窗！然後我哋跟住掌故館職員帶我哋遊一次唐人街，睇住幾十年前甚至一百年前嘅圖片對比吓現時嘅建築物，發現好多都真係無乜點變，保養得好好，再聽埋當年嘅典故之後，望返唐人街真係有另一番體會。今次十分感謝華埠掌故館做咗咁多資料搜集為我哋帶黎咁豐富嘅導賞團，希望之後有機會再搞過！

好開心見到五十幾位不同背景嘅街坊黎到參加尋日嘅活動！尋日除咗坐定定聽講座分享，仲有集體運動環節。中間亦提供時間畀參加者同嘉賓 networking，更提供咗好加拿大式嘅茶點招待，過程非常生動有趣。

希望各位嘉賓所提供嘅資料同埋個人分享會幫助到大家未來搵工，如果搵到好工，記得同我哋講聲呀！

再次多謝以下咁多位嘉賓嘅分享：

加拿大就業情況及資源：
Mr. Michael Yue, Director, Partnership Development. Vancouver Community College
Ms. Cindy Chan, Former VCC staff

人事專業分享求職注意事項：
Ms. Jenny Liu, HR, CPHR designation

求職期間的身心健康：
Prof. Siu Yin Cheung, 體育心理學榮休教授

抵加中醫師入行個人分享：
Mr. Henry Hung, 註冊中醫師 移加港中醫 EC in Canada

鳴謝 VCC 借出場地、SFU RADIUS 支持，仲有 飲湯思源 贊助嘅精美紀念品湯包禮盒，喺度謹代表本會多謝各單位的支持。

錯過咗？唔喺溫哥華？重播連結喺呢度：

Part 1

https://youtube.com/live/Q0KFhxtAmaI?feature=share

Part 2

https://youtube.com/live/ynFICpg0aIY?feature=share

四月開始我哋開始咗桌遊聚會，目標係每兩週六定期舉行。上次我哋喺 Charisma Cafe and Dessert House 訂場玩得非常開心，玩咗 狼人殺 同埋 通路，歡迎大家帶埋自己鍾意玩嘅遊戲同其他街坊分享吓！